سيلفي مشجع داخل الميكروباص مع ”صلاح“ يزلزل السوشيال

تداول رواد مواقع التواصل الاجتماعي، صورة لأحد الأشخاص مع نجم كرة القدم العالمى محمد صلاح لاعب نادي ليفربول الإنجليزي، في المواصلات العامة.

ونالت صورة محمد صلاح، مع أحد معجبيه، إعجاب الجميع، وتم تداولها بشكل كبير على وسائل التواصل الاجتماعي، وجاءت التعليقات عليها وكان من بينها: «أصيل يا بني، صورة فيها بساطة.. الناس وحب الناس اللي هي ممكن تكون أحلى نعمة عندك».

وكتب أحمد محمود صاحب الصورة السيلفي مع محمد صلاح: "أنا بشتغل محاسب في إحدى الشركات التابعة لوزارة الطيران المدني، وأنا مروح من الشغل الساعة 4.30 مساء، كنت راكب الميكروباص في طريقي عند نادي السكة وميدان الشهيد هشام بركات، ووقف الميكروباص لاقيت محمد صلاح في العربية على شمالي".

وتابع أحمد محمود: «رفعت الموبيل اتصور معاه لقيته بصلي، واتصورت معاه، بعد كده حاولت أخد صورة تاني، لقيته بيتحرك معايا، وعرفت أنه بيستجيب ليا وللصورة، وكنت مبسوط جدًا بالصورة، وكل اللي راكبين معايا كانوا فرحانين بصلاح».

واستكمل صاحب السيلفي حديثه قائلًا: «نزلت الصورة ستوري على صفحتي بـ فيس بوك، لقيت حد من الأصدقاء اللي عندي، قالي أنا هستخدم الصورة، وبعد كده لقيت الناس كلها بتتكلم عن الموضوع ده».

واختتم: «التقاط الصورة مع صلاح لا يتعدى ثوانٍ معدودة، ومكنتش متخيل رد الفعل الكبير عليها، وأنا عمري ما قابلته ودي أول مرة أشوفه، لكن بحبه بشجعه».