نجل حميد الشاعري يهاجم حلمي بكر: ”فرق التربية كبير أوي بينك وبين الكابو”
عقب الموزع الموسيقي الشاب نديم الشاعري على الانتقادات المستمرة من الملحن حلمي بكر لوالده الفنان حميد الشاعري، في البرامج التلفزيونية في الفترة الماضية.
وانتقد نجل الشاعري بكر لحديثه المستمر عن والده، كاتباً عبر حسابه على فيس بوك: أستاذ حلمي لو محتاج مساعدة ماديا أو نفسيا الكابو مش هيتاخر عليك، لكن ما ينفعش كل ما تتزنق تروح برنامج تجيب سيرة حميد الشاعرى اللي للأسف تاريخك ميجيش تمن تاريخه ولا فنيا ولا أخلاقيا.. للأسف حلمي بكر ٣٠ سنة من عمره ما بيعملش حاجة في حياته غير التقليل من الناس ومن الفنانين ومن أعمالهم.
ووصف نديم، حلمي بكر، بصاحب النفسية الفاسدة في المجال الموسيقي، كاتبا: اوعى حضرتك تفتكر إنك محطوط في خانة الإنسان المحنك، لا أنت عبرة لكل نفسية فاسدة منتهية الصلاحية فنيا وأخلاقيا. فرق التربية كبير أوي بينك وبين الكابو حتى في الفكر الموسيقي والمعاملة مع الناس.. الكابو كبير مقامه ومش بيرد عليك عشان هو أكبر من كده وأكبر منك بالذات ودايما بيقولي ما تردش على حد. لكن ولاده كبروا ومش هيسمحوا إنك تقطع في أبوهم.
وأضاف نديم الشاعري: هو حضرتك بجد فاكر إن حميد هو اللي بوظ المزيكا فى مصر؟! المقسوم اللي حضرتك بتتكلم عليه هو اللي واكل بقاله ٣٠ سنة مع كل الفنانين وهو سر الاستمرارية والنجاح، مفيش ألبوم بينزل غير ومقسوم الكابو رانن فى الودن.
وأنهى نديم الشاعري حديثه قائلًا: حاول يا أستاذ حلمي تكسب الناس عشان الدنيا فانية. متبقاش خسران السيرة الطيبة وكمان الناس
الجدير بالذكر أن الموزع الشاب نديم الشاعري تعاون مع الهضبة عمرو دياب في ألبومه الجديد كل حياتي ، وذلك من خلال أغنية ملاك الحسن ويعد أول تعاون عملي يجمعهما بعد أن جمعت والده حميد الشاعري سنوات عمل طويلة مع الفنان عمرو دياب.
