سونيا الحبال تكتب: اختلف مع دار الافتاء..الزوجة لازم تشيل بيتها

بستغرب لما بشوف دار الافتاء وهيا مره بتقول الزوج ملوش الحق في مرتب زوجته اللي بتشتغل وان الزوجه غير مكلفه بخدمه بيتها ده فضل وليس تكليف ..

طيب احب اقولكم مين الزوجه المصريه بالذات ..اللي هيا امي وامكم وامهات كتير

احنا مش مستنين فتاوى تقول نشيل في بيوتنا ولا لا ..

احنا اللي اتعلمنا في بيت امهاتنا الام اللي بتبيع ذهبها وورثها لو حست ان جوزها في ازمه من غير ما يطلب

شوفت بعيني واتعلمت طبق الميه اللي بالملح لرجل ابويا وهو جاي تعبان مجرد يقول اه واشوف ابويا وهو بيبوس ايد امي وراسها قدامنا .

اتعلمت ان امي شريكه حياه مش فازه وديكور في البيت لما نقولها المساعده مش الزام ولا واجباتك في البيت الزام ..

هو فيه احلي من انك تبقي ابن شايف امك وابوك سند لبعض وضهر لبعض ..

ايه متعه الحياه وانا شايفه طرف مطحون وانا قاعده اتفرج واقول حقي وحقك ..

واحنا اصلا بنشتغل عشانً ولادنا وعشان نسعدهم ..سيبكم من احقق ذاتي انا كتير بحقق ذاتي لما بعرف اعمل طبق ملوخية وولادي يقولوا واو يجنن هو لازم تحقيق الذات ادوس علي اسرتي ليه يعني واي حد بيتملص من ده بنقول عليه اناني ..

عمرنا ما شوفنا الانانيه دي في بيوتنا ..اتعلمنا الام اللي بتوفر وتشيل حتي لمستقبلنا ..اتعلمنا الام والاب اللي بيحطوا الفلوس كلها علي بعض لا حد عارف ده بتاع مين ولا ايه عشان سعاده بيتنا ..

اتعلمنا نشوف الاولويات بكل واحدٍ فينا بالدور والنظام والعدل ..

اتعلمنا نطبخ وننضف ونغسل ونمرض..ونساعد واحنا مبسوطين وعمرها ما كانت منه ولا اذلال ..بالعكس كلها حب وود ودفا ..

اتعلمنا نحافظ علي مظهرنا ونبقي دائما في رونقنا وعمر المسئوليات ما كانت عائق ولا مبرر للاهمال ..

اتعلمت اشوف امي جميله وطيبه وحلوه طول فترات عمرها ..

اتعلمنا التضحيه عشان نسعد بعض ونحافظ علي مشاعر بعض ..

طلعوا افتاءات اخربوا بيها البيوت براحتكم ..كون ان فيه كام طرف مقدرش دي مشكلة اختياركم من الاساس وسلمولي ع القائمه والعفش

احنا الجيل الجدع اللي مش مستني فتوى عشان تعلمونا نحافظ علي كيان اسرتنا ازاي بعيد عن الحق والمستحق ..

الفتاوى الماديه دي متلزمناش ..ولا نعرفها ..

انا بنت ام واب طيبين عرفوني يعني ايه اكون زوجه وام قد المسئوليه مهما كانت الظروف وشكرااااا