سونيا الحبال تكتب: رجعوني لزمن الابيض واسود ارجوكم

زمن الابيض فيه ابيض والاسود فيه اسود

زمن الهوانم الحلوين لابسين لبس الهوانم واخلاقهم اخلاق هوانم لا كنّا محتاجين منظمه حقوق مرأه ولا جمعيات لدعم المرأه

رجعونا لبيت جدو وجدتي وماما وماما ..رجعوني اعرف اتعاقب لو فكرت بس امد ايدي ع السفره قبل ما بابا وماما يقول اتفضلوا ..

رجعوني اخاف احتراماااا لو شوفت المدرس بتاعى ماشي في طريق واجري امشي في طريق تاني

رجعوني تاني لبيت فيه الصوت العالي عيب وخصوصا لو فيه بنات

رجعوني تكونً كل خروجاتي بمصاحبه ماما او بابا ..وصحباتي لازم يكون ماما وبابا علي علم تام اسرتها ايه واخلاقهم ايه ..

رجعوني لاكبر قضيه شغلت الراي العام والدنيا اتقلبت الشهيره بفتاة المعادي ..لانها كانت غريبه علي مجتمعنا وحياتنا ..

رجعوني لما كنا بنحترم شيوخنا لمًا كان كلامهم زي افعالهم ..

رجعوني لمدرستي تاني وانا بعيط اخر يوم في ثالثه ثانوي في المدرسه لاني هسيب المدرسه والمدرسين وصحابي ..

رجعوني تاني اقعد في بلكونتي مع ماما وبابا واختي نضحك ونلعب ونفرح ونتبسط ..

رجعونا تاني لصور المصيف وكلنا لابسين مايوهات وعيب حد يبص ع التاني ..ولا كنا بنشوف العري المبتذل ولا ناس ناقصه بتزود قيمتها بكاس في ايديها ..

رجعوني لزمن الكلمات الجميله والحوارات الراقيه ..

بعتذر مش عايزه اسمع قشطه ومز وفكك وحمو وبيكا وفرانكوا

الزمن ده لا شبهنا ولا بتاعنا ولا نعرف عنه حاجه ..

ده اختراع مسخ ملوش طعم ولا شكل ولا ريحه ..

تعقيبا علي كل زوج وزوجه قتلوا بعض وهانت عليهم اسرتهم وحياتهم ..معذورين هيا فين حياتكم اصلا ..

انا بحب زمن الابيض والاسود رجعوني تاني

#الليل_وسماه