التخلف والرجعية ملهمش حل!.. دعاء فاروق تهاجم المسئولين بسبب المايوه

شاركت الإعلامية دعاء فاروق، جمهورها منشورًا هاجمت من خلاله المسئولين عن بعض المنشآت السياحية التي تمنع السيدات من التمتع ببعض المميزات نظرًا لارتدائهن الحجاب أو المايوه الشرعي.

وكتبت “فاروق” خلال منشورها الذي طرحته عبر صفحتها الرسمية على موقع التواصل الاجتماعى “فيس بوك” الآتي: “هو بالنسبة لزناخة بعض العقول عندنا في مصر، دي مالهاش علاج يا جماعة؟، بالنسبة للتخلف والرجعية والتفكير اللي انقرض في العالم كله ده مالوش حل ياخوانا؟”.

تابعت: “طيب بالنسبة للقرارات اللي بتطلع ومحدش بيحترمها في بلدنا؟ هل فيه حد في البلد دي فوق القانون مثلا؟ هو مش إدارة المنشآت السياحية طلعت قرار إن مينفعش حد يمنع حد من نزول الماية طالما ملتزم بالمايوه اللي لن يخل بأي شيء سوي بعض الهراء اللي في دماغ بعض المتخلفين اللي شايفين إن شكل المحجبة مش حلو لأنها مخبية الفخاد والدراعات!”.

وأضافت: “أي حد تاني مبين الفخاد ده طبعا أرقي وأنضف بكتير بناء على تفكير عقيم وغباوة منقطعة النظير معششة في دماغ بعض ممن يقولون عليهم انهم بشر، يا جماعة دول استحالة يكونوا بشر لأن البشر بيفهموا عندهم مخ ودول مفيش مخ خالص نقول طور يقولوا احلبوه، طيب هل هنفضل كل سنة لغاية أما نموت تجبرونا إننا نفضل نتكلم في شوية حاجات خلصانة في كل حتة في العالم اللي عندنا؟”.

وأردفت: “أصل دى رولز أصل دي مش تبع المنشآت السياحية أصل ده كومباوند أصل ده مطعم أبصر ايه أصل دول بيتكلموا لاوندي أصل دول من جنس تاني غير جنسكم.. حضرتك اتفضل أعمل حاجة برايفت لنفسكم محدش هيفكر يدخلها إنما تعمل لي كومباوند وتلهف فلوس من السكان على قلبكم زي المهلبية إنما لو نفس السكان دول محجبات تمنعهم من التمتع بنفس المميزات اللي واخداها جارتها بس الميزة في جارتها انها لابسة مكشوف، وهي دي الميزة فقط لا غير”.

واستكملت: “لا حضرتك هو مش أبعدية باباه.. دي مش وسية ماماه واحنا جايين من الشارع نازلين بعبلنا فيها، الناس دي بيبقوا مٌلاًك أو ضيوف المُلاًك وأهلهم صارفين عليهم دم قلبهم علام وتربية عشان يبقى عندهم مخ وبيفهموا وبيتعاملوا بمنتهى الرقي مع كل الناس مش مخهم زنخ زي ناس، المفروض بقي نروح لمين نشتكي له من التنمر والعنصرية وسوء الأدب والإهانات المستمرة لأي واحدة محجبة أصحابها غير محجبات في مجتمع شيك شوية؟ هاااا نروح لمين؟”.

واختتمت: “قال شيك قال.. الشياكة في العقل والتصرفات مع الغير وتقبل الآخر يا عديمي الشياكة يا فناطيس قلة المفهومية”.