سونيا الحبال تكتب: باب الشقة

وانا صغيره ..دخلت من باب شقتنا علي أوضتي مباشره ..ونسيت اقفل باب الشقه ..ماما كانت في المطبخ بتجهز لينا الغدا ..بابا جه اتفاجيء ان باب الشقه كان مفتوح ..

نادي ماما وماما نادتلي..وفضل التحقيق معايا سااااعه ..انتي ازاي تنسي تقفلي باب الشقه ..

انتي عارفه كان ممكن يحصل ايه ..قعدت ماما تحكى علي فلانه وفلان لما نسيوا باب شقتهم مفتوح حصلهم ايه ..وازاي اتسرقوا وازاي بنتهم انخطفت واللي اتسرق منه اوراق مهمه ..حكايات كتير اوى علي باب الشقه ده..وانا عيطت لان نظره بابا ليًا بعتاب كانت كفيله تموتني سنه بحالها ..

خلص دور ماما ..جه بابا بقي الله يرحمه خدني علي اوضته ..وقالي بهدوء ..انتي فاكره باب الشقه ده حته خشب فيها مفتاح بنفتح بيه الباب ونقفله !!!!

لا يا حبييتي الباب ده رمز امان للموجودين وراه

الباب ده غطا وستر لكل حاجه بتحصل للمكان اللي وراه

الباب ده لو فضل مفتوح ..يبقي بندخل القريب والغريب في كل حياتنا ..يبقي كاننا عايشين معاهم ومعانا ..

الباب ده قفله معناه ..الخصوصيه والاحترام ورساله انذار لاي حد يمر من قدّامه ..

قالي هو ايه الفرق بين الشارع وبيتك ..؟؟؟

الفرق ان البيت له باب مقفول علي كل اللي فيه باسرارهم بحالهم بامورهم ..انما الشارع ملوش باب لانه مكشوف اي حاجه بتحصل فيه متاحه لكل حد واي حد ..

اقفلوا باب بيوتكم كويس اوى . واتاكدوامن غلقه كويس وانتم داخلينها ..خللوا صوتكم جوه بيوتكم تسمعوه انتوا بس ..لان كتير من الناس محتاجه تعدي الباب ده من غير فتحه ..

باب البيت المفتوح والصوت العالي ..رساله لكل انسان حواليكم انه متاح يتدخل في اموركم ويدخل حياتكم عنوه ..

باب البيت المقفول مش مجرد باب ..ده رمز الامان والخصوصيه والحدود والاحترام .

تعلمت الدرس منذ الطفوله يا ابي ..رحمة الله عليك.



وايضا.. هند الصنعاني تكتب: الظهور يقسم الظهور



وايضا .. محمد الغيطي يكتب: صرخة نوح والتأريخ لوطن الجمال والفن



وايضا.. https://www.facebook.com/anahwa2019