طريقة عمل ماسك الذهب للبشرة بمكونات طبيعية

ماسك الذهب يعتبر من اشهر الماسكات اللي بتستخدم في كتير من صالونات التجميل، او بتشتريه كمنتج جاهز وبتعمليه انتي في البيت، لكن ممكن تكون تكلفته عالية شوية على بنات كتير، واحنا اتكلمنا في موضوع قبل كده عن فوايده للبشرة بالتفصيل ولكن النهاردة هنقولك طريقة ماسك الذهب بمكونات طبيعية ، وهيديكي تقريبا نفس نتيجة الماسك الجاهز.



وأيضًا.. طريقة عمل مزيل مناكير في المنزل



طريقة ماسك الذهب بمكونات طبيعية:



[caption id="attachment_50308" align="aligncenter" width="2000"] ماسك الذهب للبشرة بمكونات طبيعية[/caption]

1- التنضيف:

اول حاجة محتاجينها قبل الماسك هي تنضيف البشرة.

الحاجات اللي هتحتاجيها:

كام معلقة كبيرة لبن.



قطن.

الطريقة:

1- اول حاجة هاتي قطعة فطن اغمسيها في اللبن.



2- امسحي وشك كله ورقبتك بالللبن.



3- دلكي الوش والرقبة بحركات دائرية خفيفة لمدة 5 دقايق.



4- سيبي اللبن على بشرتك كام دقيقة كمان لحد ما ينشف.



5- بمجرد ما اللبن ينشف على بشرتك تقدري تغسليه بمية دافية او مية باردة, وبعدها نشفي البشرة.



التنضيف بيساعد في ازالة جميع الاوساخ والاتربة اللي موجودة في الطبقة الاولانية من البشرة, واللبن معروف انه مطهر ممتاز جدا للبشرة, وبيغذي البشرة بالمغذيات المناسبة, وبيمنع بشرتك من الجفاف.

2- البخار:

وأيضًا.. طريقة عمل تونيك للشعر لحل جميع مشاكله

الحاجات اللي هتحتاجيها:

فوطة.



مية مغلية.



كام نقطة من اي زيت عطري “اختياري”.



اعشاب “اختياري”.

الطريقة:

1- عشان تعملي بخار للبشرة انتي محتاجة تغطي راسك كلها بالفوطة.



2- وبعدين هاتي طبق امليه بمية مغلية.



3- تقدري تضيفي للمية اي اعشاب زي البابونج او النعناع, او اي نوع زيت عطري, هيخلي عملية البخار ليها تأثير فعال اكتر على البشرة.



4- حطي وشك في مواجهة البخار وانتي مغطية راسك بالفوطة عشان تخلي البخار كله يطلع على الوش.



5- خلي الوش على البخار لمدة دقايق لحد ما توصلي للحرارة اللي تقدري تتحميلها.



6- المفروض تفضلي معرضة الوش للبخار لمدة متقلش عن 4 – 5 دقايق عشان كل مسام البشرة تتفتح وتستقبل الماسك كويس.



7- اتأكدي انك تخلي وشك قريب من البخار بقدر الامكان من غير ما تضريه.



8- بعدها ابعدي وشك عن البخار وشيلي الفوطة.



9- دلوقتي هاتي قطعة قطن صغيرة وامسحي بيها الوش عشان تتخلصي من كل الاوساخ والغبار واي شوائب على الجلد.



10- وتقدري كمان تغسلي وشك بمية دافية او باردة وتنشفيه بالفوطة.



البخار يعتبر من افضل الخطوات اللي ممكن تعمليها عشان تنضفي المسام وتتخلصي من كل الشوائب المتراكمة في اعماق طبقات البشرة, وكمان بيساعد انه يزيل كل الزيوت الزيادة من المسام المسدودة, وبعد البخار المسام كلها بتتفتح وده بيخلي كل الشوائب اللي جوه المسام تخرج بسهولة.

3- التقشير:

الحاجات اللي هتحتاجيها:

1 معلقة كبيرة سكر.



1 معلقة كبيرة عسل.



1 معلقة كبيرة عصير ليمون.

الطريقة:

1- في طبق صغير اخلطي كل المكونات مع بعض كويس.



2- حطي الخليط على الوش والرقبة, وابدأي اعملي تدليك للبشرة في حركات دائرية.



3- استمري في التدليك من 3 – 5 دقايق.



4- بعدها اغسلي بشرتك بمية دافية او مية باردة ونشفيها.



التقشير يعتبر طريقة ممتازة جدا للتخلص من كل خلايا الجلد الميت من البشرة.

4- ماسك الذهب بمكونات طبيعية:

الحاجات اللي هتحتاجيها:

1 معلقة كبيرة عسل.



½ معلقة كبيرة عصير ليمون.



1 معلقة كبيرة زبادي.



¼ معلقة كبيرة كركم مطحون.



½ معلقة كبيرة من زيت جوز الهند.

الطريقة:

1- في طبق صغير اخلطي كل المكونات مع بعض, وقلبيها لحد ما تمتزج كويس.



2- وزعي الخليط على البشرة كلها.



3- سيبي الخليط على البشرة لمدة 20 دقيقة لحد ما ينشف.



4- بعدها اغسلي بشرتك بمية دافية او مية باردة ونشفيها.



كل المكونات الموجودة في ماسك الذهب ده مفيدة جدا للبشرة, هتغذيها وتخلي بشرتك صحية ونضرة ولونها موحد.

5- كريم الذهب:

اخر خطوة هي ترطيب البشرة بكريم الذهب المرطب, تقدري تشتري كريم مرطب بجزيئات الذهب المتوفر في الصيدليات زي ايفا او بوندس او اي نوع من كريمات الذهب المتوفرة في الصيدليات او من مواقع التسوق اون لاين.



1- بعد ما تعملي كل الخطوات اللي قولناها فوق رطبي بشرتك بالكريم.



2- سيبيه على البشرة لمدة 10 دقايق, وبعدها هاتي قطعة قطن وامسحي الكريم من على البشرة.



3- ولو مش متوفر كريم الذهب ممكن تستخدمي كريم مرطب عادي او سيروم للترطيب وسيبيه على البشرة من غير ما تمسحيه.



الخطوة دي هتحافظ على بشرتك مترطبة طول الوقت.