امل صبحي تكتب: جنة الساحل التي تحولت واصبحت فتنة طبقية خطيرة

تحول من جنة فهل يكذبون ام يتجملون ام يمثلون علي بعض تحول الساحل الشمالي جنة الله في الارض والطبيعة الخلابة والشمس والبحر والهواء في مصر من مجرد مصيف ومكان ساحر وخلاب لمجموعة شركات للتصنيفات الانسانية بالضبط مثل النظم التعليمية المستحدثه في مجتمعنا ناشيونال. انترناشيونال. وماادراك باك اي جي امريكان اي بي وفجوه غير عاديه بين المجتمع وتفسخ غير عادي وتنمر علي الانسانيه واصبحت اكره كمان تصنيفات الساحل
بكرهه بتصنيفاته شرير وطيب وغنى وفقير بكرهه بعقده النفسيه وتشوهاته الاجتماعيه.

الفكره مش فى القدره على الصرف ومجاراة ناس معاها فلوس الواحد الحمد لله يقدر يصرف ويروح وييجى ...وياما روحت اماكن كويسه جوا مصر وبراها واستمتعت جدا اصل انا من جيل بيانكي البحر والشمس والهواء والاستمتاع من غير الماظات وماركات وفول ميكب علي الصبح والحمد لله ...بس عمرى ما صرفت قرش فى غير محله وبالشكل المستفز ده يعني شقيانه من صغري يعني عارفه الجنيه بيجي ازاي ويتصرف فين من غير منظره ... يعنى انك تصرف فلوس اكتر عشان تحاول تثبت مستواك أو تعلى على حد بالمصاريف عشان تبان احسن منه ...ده اسمه عبث وجنون مطلق ...يعني ماشتريش بوله ايس كريم ب٢٥٠ علشان من عند فلان او علان ماله النظامي ايس كريم بجد ولا اشتري فيشار ب ١٠٠ جنيه ما انا بعمل الحله كلها في خمس دقايق ب٢٠ جنيه

•يعنى ايه تدخل مكان تدفع فيه باركينج 2000 جنيه وما تقدرش تفتح بوقك عشان ما يبانش انك من طبقه يااي ازاى بيتكلم فى ركنه ب2000 جنيه ...انت مجنون يا ابنى ...؟
انت كده مش بتثبت نضافتك ولا مستواك ...انت بتثبت نقصك وسفهك ..ولو فى عيلتك حد عاقل المفروض يرفع عليك قضية حجر ...انت ناقص الاهليه بكل المقاييس ...

•يعنى ايه تدخل أى مكان فى الدنيا تلاقى كل اللى شافوك من اول فرد الأمن لآخر واحد على البحر بيبصلك ويجيبك من فوقك لتحتك فى اختبار حيوانى عبيط لدرجتك الاجتماعيه ومدى كونك نضيف ولا نضيف اوى ولا نضيف اوى برو ولا متستحقش تبقى موجود فى الحياه ...لابس من مجرد زارا عادى زيك يا عادى ولا لابس ماركات من اللى بتعدى مجرد ألوفات بسيطه يا فقير ...الساعه اللى انت لابسها ابل ولا صينى يا عم الولد الي واقف ده طالب هندسه تفتكر يعيني حايكون سوي ويكمل دراسته ويرجع بيته طبيعي بعد ما شاف بيك وميكا بالملايين.. عربيتك مجرد قشقاى ولا توسان يا فلاح ولا تتدخل معانا فى سباق ولاد الزوات بعربيات باتمان اللى معانا ...قمة النقص والاحساس بالدونيه ...

•المشكله الأكبر مش فى اللى فات ...المشكله الأكبر أن فى ناس فاكره أن اللى بتشوفه ده هو الثابت والصح وان هو اللى عدمان ووحش ...الطبقات تاهت وسط بعضها بتمثيل ...المتوسط نفسه يبقى غنى والغنى نفسه يبقى أغنى والاغنى بيعلى على اللى تحتيه ومتنرفذ من اللى فوقيه ..تلاقى بنت انت عارف انها غالبا من مدينه عاديه واهلها متوسطين وحالتهم حال الاغلبيه حال عادى ..عشان توصل الطبقه اللى نفسها تخالطها وتعيش عيشتها بتبدأ تتنازل فى لبسها وشربها وكلامها ...ترقص تشرب مخدرات ....تلبس مش مجرد بكينى ..لا بكينى من اللى الأجانب فى شرم وغردقه وبرا اصلا ما يلبسهوش ...دى مش مواصفات البنت النضيفه يا غبيه ... ده الشقي والمعافره بتعطيكي قوه يا تافهه وضعك انتي من تصنعيه دى مواصفات لا مؤاخذه البنت الشمال ...ولا الطبقه اللى انتى بتتلزقى فيها هتشوفك غير كده على فكره ...الواد من دول بيعمل المستحيل عشان يدخل حفله من إياهم من اللى كله بيتعمله انترفيو رخيص عشان يدخلها واللى هما بيبقوا لابسين ابيض فى ابيض دول وتلاقيه متداين وعليه فلوس ومستلف وفى الغالب دافع للمزه اللى جايبها معاه من قلب المدن الطيبه او حد من المرضي النفسين دافعله علشان افتر بارتي يبداو يتنمروا عليهم للتسليه ويعني يبدا يخليها تقلع عشان بس يدخل يشرب ويقلع ويثبت لنفسه أنه جامد .

ارحموا نفسكوا يا جماعه وتأقلموا مع الحقيقه الكونيه أن ربنا خلق الناس طبقات مش طبقه واحده وأنه أقر بكده فى القرآن الكريم ...مش لازم خالص عشان اتبسط ابقى شبه حد تانى أو معايا اللى معاه ...مش هبقى ناقص أو متخلف لو عيشت عيشة أهلى وعلى قد اللى معايا فى مكان بيحترم الناس وفلوسها ...مش مكان بيعلى عليك وشايفك مجرد فيزا وما يهموش غير أنه يقلبك مش مهم انت جايب الفلوس ازاى ...اتقوا الله فى عيالكم ونفسكم وفلوسكم .

وعلى فكره دى مش دعوه خالص انك تحرم نفسك من حاجه او تعيش تعيس ...بالعكس حوش وسافر يمين وشمال وانبسط فى احلى اماكن بس بدون عقد نفسيه وبدون نظرات طبقيه منك او ليك للناس اللى حواليك ...سيب اللى معاه فلوس يعمل اللى هو شايفه بطريقته بس من غير ما يصنفك أو يقلل منك واعمل كمان اللى انت عاوزه من غير ما تبص لحد اقل منك بطريقه تزعله وتقلل منه ولا تبص للى فوقك أنه حلم نفسك توصله ...
انت اصلا مش محتاج تثبت لحد حاجه عنك ...لأن اللى بيميزك عنه انك انت هو انت مش هو ...
سافروا وانبسطوا على قد اللى معاكم ...سافروا لأماكن تقدر انك جاى تنبسط فيها وبتساعدك بكل الطرق انك تكون مبسوط ...سافروا فى أماكن ناسها متربيه ومعندهمش عقد اجتماعيه ونفسيه أيا كانت طبقتهم ...وساعتها هتلاقى نفسك وسطهم مهما كنت ومهما كانوا .
وإلى أن يصبح الساحل الشمالى أحد تلك الأماكن# المصريه الجميله والمتعه دون التصنيف سيظل كرهى له ممتد
له ولمن صنعوه وباعوه وصدروه لشبابنا ولادنا واحفادنا والاجيال القادمه لم تكن المعموره ولا بيانكي ولا مراقيا ولا مارينا بكل هذه التصنيف ولا الامراض النفسيه ام عن الحفلات فحدث ولا حرج ارجوا الا تحاسبنا الدوله عن هذه الشريحه المجتمعيه البسيطه جدا وتنظر للموظف الذي يتقاضي ٣٠٠٠ الف جنيه ويريد ان يربي ويعلم ابنائه ارحمونا يرحمكم الله as .