نهى العمروسي: الست مظلومة في الزواج ومهدور حقها
تحدثت الفنانة نهى العمروسي عن رأيها في الزواج، مشيرة إلى أن الزواج في المجتمع الشرقي؛ يِنَدِّم، وأن أسعد لحظة في الزواج هي الطلاق.
وأضافت نهى العمروسي، خلال تصريحات تليفزيونية: الجواز يِنَدِّم، خاصة في مجتمعاتنا الشرقية؛ لأن عندنا ذكورية زيادة عن اللزوم، وحقوق الراجل مفروغ منها، أكتر من الست، والست بتتظلم؛ لأن الراجل مهما كان بيحب مراته، بيعرف عليها واحدة واتنين، فالمنظومة دي فاشلة؛ لأن ده بيقلل من قيمة الست، حتى في الدراما، لما الراجل بيكلِّم مراته؛ بيقول: الحكومة بتكلمني، بالإضافة إلى الضرب والإهانة، لذا فالمجتمع به مشكلة في العلاقات الزوجية، وفي حلقات أو حُفَر بتودي في داهية.
وقالت نهى العمروسي: مفيش احترام وصدق متبادل، فالكذاب جبان؛ لأنه خايف يقول الحقيقة، ومش بقول إن الست هايلة، لكن في مشكلة العلاقات الزوجية، قبل الزواج، كل واحد بيقدم الحلو، وأول ما بيتجوزا؛ ما حدش بيهتم، فيه خلل ما بيحصل، خصوصا في المجتمعات الشرقية، ومش بقول إن الغربيين ملايكة؛ لكن لما بيخونوا، بيقولوا، وهما حرين، يسامحوا بعض أو لأ.
وأكملت نهى العمروسي، حديثها: أسعد لحظة في الجواز هي الطلاق، دي حكمة مِنِّي في مجتمعنا.
وفي سياق آخر، تحدثت نهى العمروسي عن تفاصيل دخولها السجن، قائلة: لا أعلم بالأسباب، لكنها كانت تجربة مهمة جدًا وعمقتني والقلم والوجع، والظلم واللي بتتعرضي له بيعمقك إنسانيا، وقلبك بيتملي بخبرات، وكمان قابلت ناس عمري ما كنت هقابلهم مش كلهم مجرمين، ومنهم واحدة كانت هتتعدم وحبيتها جدًا وتعاطفت معاها.
