«عايزة أطلق.. حاضر» حديث رواد السوشيال ميديا
تداول رواد السوشيال ميديا خلال الآونة الأخيرة حديث لرجل وزوجته، يظهر من خلاله الرجل مسالمًا للغاية بينما زوجته تظهر وجهًا آخر من الأنثى غير المعتاد عليها، حيث الغضب والتحكم وكثرة قول "عايزة أطلق" ولكن سرعان ما يتدارك الزوج غضبها.
وفيما يلى يستعرض "أنا حوا" حديثهم :- أنا عايزة أتطلق - حاضر - إيه بقا حاضر ديه إن شاء الله!! - حاضر يعني حاضر هطلقك.. إيه اللي مش مفهوم ف كلامي؟ - مش عايز تعرف عايزة أتطلق ليه؟! - كنتي قلتيلي قبل كده كذا حاجة وأكيد عندك أسبابك المنطقية اللي تخليكي تطلبي الطلاق.. إنتي مش صغيرة وعارفة مصلحتك - يعني إيه بقا مش صغيرة ديه! لأ يا حبيبي أنا لسه صغيرة ونص ولو كنت إنت.... - خلاص.. إنتي صغيرة وعارفة مصلحتك - صغيرة في السن بس عقلي كبير وفاهمة - أكيد - هتطلقني إمتى بقا؟! - بعد ما أرجع من الشغل - وهتعمل إيه ف الولاد؟ - زي ما إنتي عايزة - مش زي ما انا عايزة يا بابا، زي قانون الأسرة الجديد ما بيقول.. العيال هيفضلوا معايا لحد ما يتموا ١٨ سنة - ماشي.. ولو عايزاهم على طول براحتك - طبعًا عايز تخلص منهم عشان تتصرمح وتروح تتجوز وأنا اللي افضل موقفة حياتي ف تربيتهم! - خلاص هاخدهم اربيهم واتصرمحي إنتي واتجوزي - لا يا حبيبي، الصرمحة ليها ناسها.. ومش هتلوي دراعي بالعيال وهاخدهم غصب عنك - حاضر - وهاخد الشقة زي ما القانون بيقول - ماشي - طبعًا، ما إنت هتسيبهالي خرابة وتروح تجيبلك شقة نضيفة.. ما أهوه أنا وعيالك مش مهمين عندك - مهمين طبعًا - والنفقة هاخدها من عينك - من عينيا حاضر - وهنقل الولاد فى مدارس إنترناشيونال وهتدفع مصاريفها - أحسن برضو - والعربية - تحت أمرك - تقدر تقولي هتقعد فين بقا بعد الطلاق؟ - هتصرف.. ماتشغليش بالك - وأشغل بالي ليه! ما إنت هتسيبني معكوكة مع عيالك وتروح إنت تروق دماغك ف أي حتة - ربنا يسهل - طب إيه رأيك بقا إننا هنتطلق وهتقعد معانا هنا.. ما أنا مش هشيل الطين كله لوحدي - حاضر - قايم رايح فين؟ - الحمام - إعمل حسابك لو قطعت شرايينك بالموس هنكد عليك عيشتك.. أنا مش مستعدة أبقا أرملة وكل من هب ودب يجيب ف سيرتي - أنتحر وأسيب الكيكة اللي ف المطبخ ديه لمين بس! - بجد عجبتك! - ديه تحفة - بس حاساها هبطانة وناشفة وسكرها كتير ومش عاجباك - إوعي تقولي كده، ديه أحلى كيكة دوقتها ف حياتي.. خشي هاتيلي منها - ماشي وهعملك فنجان قهوة يعدل مزاجك وأيضًا.. https://www.facebook.com/anahwa2019
