نانسى إبراهيم تكتب.. حب وقت الفراغ

بمناسبة السنة الجديدة والبدايات الـFresh والصفحات البيضا للعام الجديد، فأحب أقولكم وأقول لنفسى، سهل أوى تعرفوا اللى بيحبكم وبيقدركم فى أى علاقة إنسانية حب كانت أو صداقة (الحب مش كلام ولا أفعال لحظية، الحب الحقيقى الفطرى هو إلتزام عمر، هو القائم على الاحترام، وتفضيل اللى بيحبك لك على نفسه، اللى يفرح لفرحك ويحزن لحزنك، هو الإنسان اللى يدور على ايه اللى ممكن يسعدك و يعمله، اللى يشوف ايه اللى يرضيك وينفذه، هو الإنسان اللى ما يشوفش فيك غير مزايا ويتجاوز عن كل عيوبك، اللى ما يجرؤش ولا حتى يفكر يجرحك، هو الإنسان اللى لما تيجى سيرتك عيونه تلمع ونبضات قلبه تزيد، هو الإنسان اللى لما يتكلم عنك يخليك على رأس كل الناس تاج، هو اللى يطوع ظروفه عشان يبقى معاك، وما يتخيلش حياته من غيرك، هو اللى يتمنى يحطك جوا قلبه ويشيلك جوا عينيه علشان خايف عليك من نسمة الهوا لا تجرحك، هو اللى ما يحكمش عليك، أو يظلمك، أو يهينك، أو يكسرك، أو يغدر بيك، هو اللى يكون نعم الصديق، وخير سند، ومصدر راحتك، و قوتك اللى ممكن تواجه بيها الكون، هو الفخور بوجودك فى حياته، اللى لما تغيب يفتقدك، ولما تبقى موجود يصونك، اللى يحطك فى المرتبة الأولى قبل كل شيئ وقبل أى حد، اللى يحمد ربنا انه لقاك لأن بيك لقى روحه واكتملت سعادته وودع إحساسه بالوحدة، وأصبح حى من تانى، هو الإخلاص عنوانه، اللى ما يسمحش لنفسه حد تانى يشاركك فيه، اللى يعتبر أى لحظة بينكم عيد، اللى يحول تواريخ مهمة أو حتى عادية فى حياتك لذكريات لا تنسى).

أما حب أوقات الفراغ، أو حب الناس الكاملة اللى عايزينك دايمًا خارج من برواز صورة، أو الحب اللى فى السر، أو حب الكتالوج اللى يسير وفق إرشادات تعليمية، أو الحب المشروط، أو الحب المبتور المعاق اللى ناقص حتة ده أكيد مش حب.. ممكن يكون احتياج، إعجاب، افتتان، انجذاب، تعود، رغبة ف الاكتمال.. أو أى مسمى تانى تختاروه.

انتبهوا.. {الحب مش محتاج تصريح، الحب صوته عالى وصريح}، وكل سنة وأنتم للحب عنوان.. ويكون لكم فى كل قلب مكان.