بقلم آدم وحوا

باسم شريف يكتب: ردا على بعض الزملا من فرقة السبوبة

لا معلش ماهى عظمة مصر وتاريخ مصر وسمعة الفن المصري اهم حضرتك بكتير من الزملا ومشاعر الزملا واجور الزملا .

وعلاقتك الجيدة بيهم. ولو على وقوف المسلسل فياما مسلسلات وافلام وقفت ومكملتش وما جراش حاجة عادي.

ثم انك بقالك كذا سنة شايف موهوبين وعناصر فنية على قدر عالي من الكفاءة قاعدين في البيوت ومنهم ناس مش لاقيين يكلوا ومتعاطفتش ولا نطقت بكلمة!!

بص ياسيدي ، اللي أضر بهؤلاء الزملاء – اللي حضرتك متعاطف معاهم اللي هما غالباً نجوم ومن الشلة المرضي عنها – هما ذات نفسهم ، هما اللي ضروا نفسهم أولاً بحبهم لمكتسبات فن التمثيل قبل التمثيل نفسه، لان لو حد فيهم بيحب فن التمثيل في ذاته ومخلص لفن التمثيل في ذاته، كان ذاكر كويس وقرا كويس وحضر كويس وناقش فريق العمل وفِي الحالة دي لو كان اشتغل بقى غصب عنه وإذا كان مقدرش يعتذر عن عمل غير منضبط وميشاركش في عمل ضد قناعاته اللي وصلها من خلال الاجتهاد والمذاكرة بحجة مشي حالك واكل العيش والتواجد، فمفتكرش انه زعلان دلوقتي او حزين – ده لو هو فنان حقيقي – برضه اللي أضر بهؤلاء الزملاء هو اللي قرر يستسهل ويتعامل باستهتار مع عمل فني تاريخي هام .

وعلى رأي المثل الشعبي ” بيت المهمل بيخرب قبل بيت الظالم ” فحضرتك بقى جو لأ اصل مينفعش نمنع المسلسل ، فده منطق فاسد ومفسد لانه هيخلي المجتهدين والباحثين والفنانين الحقيقيين في البلد دي يزعلوا على نفسهم اكتر ما هما زعلانييين، انت عجيب اوي يا اخي ، يعني انت زعلان علشان مرة واحدة مرة واحدة في انتصار حصل للعلم والمعرفة والمنطق والعقل والجد والاجتهاد ؟!! مش معقول نبقى بلد عريق عندنا أكاديميات لتدريس الفنون ومدرسين وباحثين ومفكرين وعباقرة ومبدعين، وناس بتضيع عمرها في البحث العلمي والرسائل العلمية في جميع مناحي الفن والتاريخ والفلسفة وساير العلوم الإنسانية، وانت عايز ترمي كل ده في الزبالة علشان قال ايه اجور واحلام الزملا وعشان ليك أصدقاء صعبانين عليك ان الشغلانة ( السبوبة ) بتاعتهم باظت !! ده بالاضافة لان فكرة نتفرج وبعدين نحكم !! ده اللي هو ازاي؟؟ وهل احنا كمصريين هنتفرج لوحدنا وباقي شعوب العالم مش هتشوف المسلسل؟ وهل لو حد حط اكل قدامك بايظ وشكله مش حلو وريحته مش حلوة فتقول طب أكله ولو طعمه طلع وحش و بطني وجعتني هابقى اتصرف؟ ربنا قال هل يستوي الذين يعلمون والذين لا يعلمون. اصلك لو عايز تساوي الموهوب اللي بيجتهد واللي بيذاكر ويتعب باللي بيطلسأ وبيقلب وبيستنصح وبيتبرمج. تفتكر الموهوب ده هيفضل عنده دافع يتعب ويذاكر ويجتهد.


وعموماً يا سيدي متزعلش نفسك ، احنا هنقفل أكاديمية الفنون خلاص مالهاش لازمة ( معهد الفنون المسرحية – ومعهد السينما – والكونسير -والموسيقى العربية – والباليه – والفنون الشعبية – والنقد الفني ) ونقفل الكليات والمعاهد والأقسام المتخصصة في التاريخ والحضارة المصرية . اصل مش شايف انهم ليهم لازمة.

طالما حرية الإبداع بتكفل انك متلتزمش باي حاجة خالص ولا علم ولا منطق ولا أسس ولا مدارس ولا أساليب ولا مراجع ولا مناهج . ونسرب الباحثين والدارسين وأصحاب الدرجات العلمية بره البلد ونقفل على نفسنا ونعك براحتنا بقى ومحدش يصدعنا ويعكنن علينا.


وتعالى بس هديك مثل حلو اوي في المنطقة دي . مهما حاولت اطور في طريقة العزف على آلة موسيقية – ولتكن البيانو مثلاً – فلازم مبدئيا أتقنها الاول . ثم بعد ما أتقنها مهما كان اللي هعزفه جديد ومتطور وفيه جنان وطرقعه فالمفروض انه اقل حاجة ميبقاش نشاز . ومؤذي للآذان.

حضرتك بقى فيه واحد مبيعرفش عن آلة البيانو غير انها مفاتيح بيضا ومفاتيح سودة . وفضل يخبط ويهبد وينشز.

وقالك دي تطوير للسيمفونية التاسعة لبيتهوفن . وانت جاي تقوللي هو حر في ابداعه . ونسمع وبعدين نحكم . فحضرتك لو فيه سيارة قمامة جاية تقلب القمامة في الشارع عندنا وانت عايش معانا في الشارع وبتقنعنا انها تتقلب في الشارع الاول وبعدين اذا عملت ريحة قذرة وحشرات نبقى نتعامل مع الموقف !! فبنتعتذر لحضرتك معلش. احنا رجعنا عربية القمامة . تقدر حضرتك تستعلم عن مكان العربية فين وتروح تقعد جنبها ولا تنام في الصندوق حتى براحتك .

إنما احنا بنحب نعيش في النضافة . والسلام عليكم ورحمة الله وبركاته.

وايضا.. “حلوى مجهولة المصدر”.. إصابة أم وابنائها بالتسمم في كفر الشيخ

وايضا.. https://www.facebook.com/anahwa2019

 

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى